Әйгілі «ASHQAZAQPRO» лейблінің негізін қалап, 2007 жылы аталмыш лейблге арнап алғашқы ютуб арнамды ашқан болатынмын. Блогтар, концерттер, влогтар, сұхбаттар секілді контенттерді жасап салып, жалпы саны 15 жылдай ютубтың қыр-сырымен таныс болдым. Одан бөлек, жастар киносын түсірумен де айналысқанмын. 2006-2010 жылдар аралығында «Шәкен жұлдыздары», «Шабыт», «Дидар» сынды Республикалық кинофестивальдарға қатысып «Үздік сценарист», «Үздік музыкалық сүйемелдеу» сынды жүлделі орындарға ие болғанмын.
2020 жылы әлемді шарпыған пандемия ойын шарттарын өзгерткені рас. Карантин, локдаун нәтижесінде елдің әлеуметтік жағдайы төмендеп, барлық бизнестерім біршама тоқырауға ұшырады. Кіріс жоқ, шығын бар. Енді маған шығынсыз табыс көзін табу керек болды.
Шешімі табылды. Ол ютуб! 2007 жылдан бері жай-жапсарымен жақсы таныспын. Сонымен қатар, түсірілім және сценарий жағынан да білерім көп. Сөйтіп «ABAIBOL» ютуб арнасын ашып, небәрі 6 айда 100 000 жазылман жинап, күміс батырмаға жетіп алғаным бар.